sajak pikeun limbangan

nugar karémpan
ngambah lemah nu kungsi medarkeun ringkang
sapanjang aweuhan cipancar, duh limbangan

teuteup ditalimbeng simpé
sanggeus cacap nalatahkeun jampé
nu mindingan gigir kaketir
lebah siak nu nyorang cigawiran

nurih kainggis
ngiker régang karingrang nu haben niir pikir
nyeuseup hawa talapakan galuh pakuan, duh limbangan

pikeun lembur

limbangan, hiji peuting

bulan mapakan wuwungan
ngadangdanan peteng
nu nyangking kalangkang jempling
saluhureun tutunggul karuhun
notogkeun karémpan
nu kalan mulas harepan

aya haréwos peura, ngageberan hawa;
ku congo sapasang kujang
waruga beulah meredih getih
sangkan nyukcruk lampah tanggara
nyiar léngkob muara

béntang nangtawing sagigir pasir
ketipna ngahiap ibun
ting kolébat ngangkir kaketir
tuluy euntreup di pakarangan tajug
ngahibaran kohok rasa

aya haréwos peura, ngageberan hawa;
ku nyuprih inajén diri
kawaras atra reujeung cahara
sangkan payus rénghap buana
naha uga atawa supata

(1010)

angin janari

angin janari

mépéndé dangdaunan
nu usik digeuing angin

kapan urang geus paheut
papada suda migeugeut..

nyirep awuntah ibun
nu nyaliara ajir janari

kapan urang geus pasini
papada ngarajah diri..

(1010)




sésa enggon

sésa-sésa impian
ngabarak reujeung aksara
nu mancawura di juru enggon
nyusud rénghap anyar
tina hawa nu mingkin hapeuk
muru sora abringan reungit
saluhureun dedek kopi
nu kungsi nyeuseup jangji
antara getih sarta wanci

horéng enggon
ukur nganteurkeun ieu diri
sangkan paheut miara rasa

(0910)


isuk ieu

lebah ieu lahunan, aya haneut
nu ragrag ti langit
nuuskeun juuh tonggong
alatan dirérab teuteup anjeun
sapanjang peuting tadi

(0910)

sabab anjeun

sabab anjeun

mubus peuntaseun waktu
anjeun ngajangélék jadi halimun
nu mawur ti puhu umur
ngalimpudan gawir kaketir
tuluy nyangsaya satukangeun iga

raga amitan
seja mulas langit bihari
sangkan cangra kelir cahara
sabab anjeun ngeukeuhan rasa

(1010)


ngabaladah léngkah

mumbul wuwung langit
késang namper 'na sawangan

mebes dadampar sagara
sumsum renung nyuat balung

ngudar pamageuh dada
sangkan léngkah dibaladah
tuluy pataréma reujeung rasa

(09-1010)