nugar karémpan
ngambah lemah nu kungsi medarkeun ringkang
sapanjang aweuhan cipancar, duh limbangan
teuteup ditalimbeng simpé
sanggeus cacap nalatahkeun jampé
nu mindingan gigir kaketir
lebah siak nu nyorang cigawiran
nurih kainggis
ngiker régang karingrang nu haben niir pikir
nyeuseup hawa talapakan galuh pakuan, duh limbangan
rasa dirangsadan kamelang
tutas ngaguar tutungkusan wayah
nu anca nataan uga
lembur nanjung ngadaun ngora
nyuat kawaas
hiliwir angin ngageuing ruyuk sawangan
nyutat panglawungan ki dongkol katut ki rompang, duh limbangan
umpalan katineung kiwari kimpel
mapaésan jegir pasir
nu nangtawing 'na wates harepan
ngawelah tapak lampah sunan haruman
maut bangbaluh
jagat rentul ku tutunggul karuhun
ngemit tajug sarta jangjawokan, duh limbangan
kahéman narawang sarakan
mayakpak 'na pakarangan, ngaranjah lelembutan
gugupay ngahiap rahuh
kebat ngeurad rénghap ieu sajak
(09-10)
Tidak ada komentar:
Posting Komentar